Le parlanjhe poetevin-séntunjhaes den lés élécciuns réjhiounales

Carte-oilLa réjhiun Poetou-Chérentes at deùs parlanjhes dits « réjhiounàus »: le poetevin-séntunjhaes pi l’oucitan; le Lémousin n-en at yin: l’oucitan lémousin, auvérgnat pi lenguedocién; pi l’Aghéne (Aquitaine) troes: oucitan lémousin, gascun pi lenguedocién, basque pi poetevin-séntunjhaes den le Nord Jhirunde (Gironde). Lés Péyis de la Loere (Pays de la Loire), z-eùs, avant le poetevin-séntunjhaes en Vendàie, pi dau brtun, dau galo, de l’anjhevin..

Rén a vere ac lés élécciuns?

Bé dame si: d’abord l’UPCP-Métive envéyit aus lisces de candidats d’Aquitaine, Limousin, Poitou-Charentes pi Pays de la Loire, pi aus jhornàus é radios étou, in tésce çhi rapele qu’o fàut que lés élus sunjhant qu’o fàut faere vivàe lés parlanjhes réjhiounàus é lés faere passàe aus pu jhénes pi a trtouts çhés qu’o velant.

Apràe ol at daus parlanjhes réjhiounàus de noumais oube d’écrits den çhéques doçhuments de canpagne: de l’oucitan pi dau basque den la professiun de foe de la lisce d’Alain Rousset, pr éxenplle, mé pa de potevevin-séntunjhaes, maeme si o n-en at en nord Girunde. L’arét pu métre pa rén que « Plus forts Plus solidaires, Ensemble/Azkarrago, Elkartuago, Elgarrekin/Mei hòrts, mei solidaris, amassa » mé « Pu forts, pu soulidaeres, ensenblle », étou.

Pi ol at daus lisces qu’o z-avant mi den leù prougrame oube qu’avant répun a la létre de l’UPCP-Métive que le sant d’assent pr faere çhéque chouse pr le parlanjhe poetevin-séntunjhaes.

Enfin en Péyis de la Loere ol at ine lisce Choisir nos Régions et Réunifier la Bretagne çhi demande que la Loere Atlantique séye mie ac la Brtagne, pr daus résuns çhulturéles, istoriques pi lenghistiques.

Lés parlanjhes, ol ét ine afaere cunséquente pr ine réjhiun : o fàut pousàe daus quésciuns aus candidats su le parlanjhe, pr vere si l’avant sunjhai qu’ol ét pa rén pr la vitalitai d’ine réjhiun.

Laisser un commentaire