Acciuns autour dau parlanjhe rétas su l’Ile de Rét

Su l’Ile de Rét, cha annàie dépeùs 2008, le Corepor (Collectif pour le recueil du patrimoine oral rétais) aménajhe ine vellàie daus cuntours.

Cha annàie, o se tént den in endrét diférent de l’île é cha annàie, ol at envirun 300 persounes qui venant. O perét avoer meù de munde, mé pr gardàe l’aeme d’ine vellàie, ol en fàut pa mae, que le disant au Corepor.

2-affiche-veille_e-2016O se passe trjhou de maeme : ol ét ine lunjhe seràie avéc ine bufàie au mitan pr soupàe. Le téme de çhéte annàie (o s’at ténghu le 14 d’octoubre dérnàe), ol étét « Notes d’humour en Ré ». Ol oghit pa rén que daus cuntes obe daus istoeres, mé étou daus chançuns, daus pouémes pi de la musique. Avéc le prougrame qui étét dounai, le munde peviant segre lés istoeres pi chantàe.

O sit étou le moument de causàe dau rolea « Qu’est-o qu’te m’chantes ? » que le CRICRI, Comité pour le recueil et l’inventaire des chansons rétaises introuvables, at publlai çhéte annàie sou la menerie de Michel Fruchard, apràe ine grousse ouvrajhe de trcherie. Çhau rolea muntre mae de trente chançuns retrovàies pr le CRICRI su l’Ile de Rét, sultout daus chançuns de la trmine dau 19aeme séclle pi dau début dau 20aeme : daus chançuns tradiciounales, daus chançuns a répounàe, daus chançuns pr rire, daus chancuns su la vie locale, daus criaciuns, daus éntérprétaciuns obe daus chantusétes… Ol at daus ésplliques pr cha chançun, pi ine petite mirolure avéc.

La voe ét jhénte a l’écrivajhe peùsqu’in disque avéc 22 chançuns, chantàies pr lés parçounàes dau CRICRI, aquevalle çhau rolea !

 

Une réflexion au sujet de « Acciuns autour dau parlanjhe rétas su l’Ile de Rét »

Laisser un commentaire