Oumajhe a Liliane Jagueneau

Liliane Jagueneau
Liliane Jagueneau

Liliane Jagueneau nous at çhitai en çhau début d’annàie. Maetràesse de cunférences en lénghistique françaese é parlanjhes réjhiounàus a l’Univrsetai de Poetàe, al y dounit daus corses de poetevin-séntunjhaes é d’ouccitan pi sit l’autoure d’étuderies su les parlanjhes é d’écrivajhes en poetevin-séntunjhaes. A sit a l’orine (avéc d’àutres mundes) de la parçounerie Parlanjhe Vivant ol at casiment 20 ans. Liliane Jagueneau étét la prmére a défendre é suportir le parlanjhe pi a le faere aqueneùtre. Ol ét ine pérte cunséquente pr le poetevin-séntunjhaes.

Mérci Liliane pr ten éngajhement pi ten ouvrajhe énourmes pr le parlanjhe. Mérci pr tés calitais ouménes é ten éxenplle.

 

Liliane par Marie-Hélène Coupaye

I saviun bén qu’ol alét pa pr Liliane mé i veliun pa crére qu’o serét déjha la fin. Pi maeme i cuntiun qu’ol irét meù, qu’ol été pa poussiblle, i veliun… i veliun pa ou crére, ol étét pa pensablle…

Ol étét pa poussiblle : al étét ine si béle prsoune, si dounante, si jhénéreùse de sun tenp, de soun ouménetai, trjhou praete a dounàe la mén a queùquin pr ine afaere ou bén ine àutre.

A pevét aussi étre cabocharde quant qu’a velét faere avançàe sés idàies su le parlanjhe mé trjhou avéc pacience é le réspéc daus àutres. A ne sortét jhamae dau routin qu’al avét choesi. A ne lachét rén, al avancét trjhou pr faere aqueneùtre noutre parlanjhe é nousàutres i la siviun, alore sarun nous alàe d’afile ?

Liliane, i entendrun pu tés « peti peta » a la galope den lés colidors de la fac avéc lés bras pllén de roleas que te nous enmenàes pr nous assaventàe. I vérun pu tun chauri, i entendrun pu tés ésplliques su quou parlanjhe qui nous avét agrouai ni tés atisajhes quant qu’i causiun trop poéntu ! Alore :

A çhés fàetes ! A revoer ! Adieù ! A nous retatàe la bouléte dau jhenoll !

I t’oubllirun pa Liliane.

Laisser un commentaire