La dernière Biquette

La dérniére biquéte (Geneviève Charlot)

 

1 Foutéz li dun la pés é laesséz la toute seùle

Assite a ménme la palle, au funs de l’éçhurie.

A vaut brallàe sun las, sen s’éssujhàe lés ells

É surtout vere prsoune, avoure qu’a sant parties.

Quant la dérniére biquéte, quant la dérniére bllanchéte

At muntu den le camiun, al at pa velu lés vere,

Mé a sant la quant ménme a lés at den la tàete

Çhés imajhes de départ çhi li crvant le çheùr.

2 Bén sur que l’o z-ant velu, que l’o z-ant préparai,

Bén sur qu’o lou durét que lou z-ouvrajhe s’araete,

Le perant se prmenàe, le perant se repousàe,

L’o z-ant bén méritai d’étre enfin a la retraete.

Demén al en causerat in petit é si a pet,

Mé de sàe a vaut rén dire, a ressunjhe é a boujhe pa

É en frmant lés ells au vent qu’amene la neùt

A sent l’odeùr dous chebres queme si al étiant la.

3 L’en avant gardai deùs : Muguéte é pi Moquéte,

Un vet bén den lous ells qu’al avant dou chagrin,

Pérdues den çhau grand tét a chrchàe lés àutres bàetes,

A venant a cha moument se frotàe de cuntre sa mén,

Laessàe ùn petit de sa pàene roulàe su lou pelajhe

Al avant pa besén de touts nos grands sérmuns

Ni de nos apllacrajhes quant un tourne une pajhe,

Lés bàetes ant lou façun de dire qu’a nous aemant.

4 Si al at dit souvent qu’ol étét pa une vie

L’avant fét lou possiblle pr que lés deùs draulléres

Éyant ùn bea métié é pa touts lous soucis,

Ol étét pa une vie é prtant ol ét cllér

Qu’ol étét une béle vie qu’al arét pa chanjhàie

Pasqu’ol étét la séne é pi qu’al aemét bén

S’oçhupàe de sés chebres, lés pansàe, lés tiràe

É vere sés petits besis sautàe su lés tas de foén.

5 Demén al en causerat ùn petit é si a pet

Mé de sàe a vaut rén dire, a ressunjhe é a boujhe pa

É en frmant lés ells au vent qu’amene la neùt

A sent l’odeùr dous chebres queme si al étiant la.

Notes

La dérniére biquéte écrit, cunpousai pi chantai pr Geneviéve Charlot, seyit primai en 2004 pr la Région Poitou-Charentes. Geneviève Charlot, naessue a Gournay, den le Mellois (79), fesit queneùtre le parlanjhe a sés éléves quant al étét professeùre au Liçai agricole de Chasseneuil (86). A menit daus activitais autour dau parlanjhe ac bé d’àutres a Montamisé, Niort (Lycée horticole, CD A trtouts. Légendes poitevines), pi ché yéle, a Vendeuvre-du-Poitou, den la Vienne,voure que daus musiciéns de musique métal, Crawling in Sludge, aprniriant le parlanjhe pr faere le prmàe CD de métal en parlanjhe. A metit en lan l’émiciun Ol ét le moument ac Liliane Jagueneau (1996) é seyit yine daus fundatrices de Parlanjhe Vivant (1999). A chante pi a dit daus tésces d’ Ulysse Dubois pi a grafegnit en parlanjhe é metit en musique le cunte musical La Dame de Chambrille, ine léjhende de La Mothe-Saint-Héray, ac daus chançuns en françaes. Den sés CD de chançuns a mét tout le tenp in téxte en parlanjhe :
- Antonine (Geneviève Charlot) den le CD Vies de femmes (1994) [çhi se trouve pu a ajhetàe]
- Assit a bas (Ulysse Dubois), den le CD Passages (1996)
- Ché Gustine (Ulysse Dubois) den le CD Paroles pierres (2000)
- La dernière biquette (Geneviève Charlot), den le CD Le présent intérieur (2005)
- Va lou dire (Ulysse Dubois) den le CD Du silence à la parole (2011)

A chante su séne, den la réjhiun pi allour, jhusqu’aus Etats-Unis.