Le traen çhi sort Micheline de sun traen-traen

Le traen çhi sort Micheline de sun traen-traen (Micheline Dubois)

[1]

I va vous passàe lés détalls entr le moument voure qu’al at décidai qu’al y érét é pi la jhornàie voure qu’ol at falu partir.

Pasque Micheline (petit-num prédestinai) ol ét ine paesane de çhaulun çhi at jhamae sorti de sun creùs. Si, en auto, pr alàe a la foere a Brioux, a cha cop qu’a pevét quant sen ouvrajhe étét finie a tenp ; pi, une fés pr an a çhéle de Javarzay pr ajhetàe daùs piruns é a çhéle de Niort pr se prmenàe. Autrment, rén ; a si, in véyajhe a Lourdes, aussetout mariàie, avéc la paroece, mé ol étét en car. En traen, jhamae. Alore, ol ét toute ine afaere. Micheline al ét pu que toute seùle ché lai. Sen oume, l’ét mort, ol at bé dis annàies. Sés parents atou, a lés at soignais jhusqu’a leù deràe souflle. Lés deùs draules sant mariais allour ; é la draulàesse, la petite derére, çhéle dunt a se serét bén passai, al at fét daus études pendant i sé pa cunbén d’annàies, al ét « docteur » mè a soegne pa lés malades. Aléz dun y cunprendre çheùque chouse. A demeùre a Paris ; ol ét pr çheù qu’a dét prendre le traen. Quoure ét o que tu véndras me voer ? Dépeùs cunbén de tenp qu’al o demande ? Ol ét pa qu’al o velét pa, o li fasét maeme pllési d’y alàe. Mé, ce çhi la tabutét, ol étét çhau véyajhe en traen. Daniel t’enmenerat a la gare de Niort é i véndrae te chrchàe su le çhai de la gare a Paris. Tu peras pa te pérdre. L’avant ajhetai le billét, avoure a pet pu çhulàe.

I ae di çh’i vous passeràe lés détalls entr la décidaciun é le jhour de partanjhe. Prtant, o l’enpaechét de dormir la neùt. Si a s’endormét, a s’évellét, a ressautét, a se créyét cheùte dau traen ou bé çhau traen s’araetét jhamae, le rolét a toute brzingue jhusqu’a se bourdàe den ine grande muralle. In matin, au lieu d’ouvrir aus poules, al ouvrit aus lapins. L’étiant prtout éparais den la cour, al at passai la matinàie a lés galopàe. Bun, ol ét aneùt qu’al y vat. Sa valise ét pràete, lai-tou. Le billét ét bén pllaçai den sa bourse avéc le papàe voure qu’al at écrit l’adraece é le lumérot de teléfoune de sa felle (de çhau tenp, o y avét pa de portablle, ol étét quant le TGV at quemençai a passàe a Niort). Al ét muntàie den le traen, apouàie a sa pllace, in cop de subllot é le traen ét parti. A la fin dau cunte, ol étét pa la paene de s’en faere tout s’ét bén passai. Avoure ol at pu qu’a atenir Paris. Al ét cuntente, o passe trjhou çheùquin, a voét pa le tenp passàe.

Mé, velat o pa qu’al at besén de pissàe !! Prtant, al o z-at fét jhusce avant de partir é al at rén bu dépeùs. Mae al y sunjhe, mae o la pràesse. Prtant, al at pa envie de boujhàe, o fàut déjha réussir a se métre debout é pi apràe a pa brandijholàe. E voure ét o qu’ol ét ? Sen fall li at fét voer en muntant. A pet pu tenir, o fàut y alàe. Debout, o vat ; a prent sun sac su sun épale, o vat ; al avance, o vat ; al ouvre la porte dau vagun, o vat ; pi çhéle daus aesances, o vat ; a rentre, o vat trjhou. Ol ét pa pu grant que le crnun aus chebres, fét qu’a tént debout. A fét sés afaeres, o vat ; a ressort, a referme la porte, o vat ; çhéle dau vagun ét uvérte, a passe é pi a sét pa ce çhi se passe, çhéte porte se referme avant qu’a séjhe passàie. Al at bea çhulàe, mé sés lunétes chéusant a bas. Voét pu rén !! Al acrapougne sun sac tant qu’a pet. Ol at çheùquin çhi la ramene a sa pllace. A s’assit, al ét toute ébrlobàie, sés lunétes sant posàies su sés jhenells, copàies en déus pr le mitan. Que faere ? Le cuntroleur vént la voer, le la recunsole. Pi, le revént li colàe sés lunétes avéc dau chaterton. Queme lés veres sant pa cassais, a pet lés remétre. A vedrét bé s’argardàe den ine gllace mé a veùt pa retournàe aus aesences, pa quésciun ! Avoure, a débournijherét pa de sa pllace jhusqu’arive. Le voéyajhe se finit bén. Sa felle ét la çhi l’atént. Pr sur qu’al at bén rigolai quant a l’at vu avéc sés lunétes recolàies.

Apràe çhéle aburéngue, Micheline at cuntinuai a voéyajhàe pasque sa felle at étai demeùràe en Alemagne, pi en Tunisie et pi atou en Turquie. Queme ol étét de pu en pu loén, a prnét pa le traen, a prnét l’aviun. Ce çhi fét qu’o y avét pu de portes çhi se fermiant toute seùles é que tout s’ét trjhou bén passai.

opendocument text - 8.2 ko

Notes

[1] [[Micheline Dubois ét néssùe a Brulain, o y at çheùques annàies den ine famelle de paesans. Avoure, a demeùre a Niort é queme al ét a la retraete, a segue lés cours de l’atelié Parlanjhe de Vouillé dépeùs deùs ans. Al at participai au cuncours Diséz zou vite é bén en 2011 ac le récit de veyajhe Tarmast, pi au cuncours de la Réjhiun Poetou-Chérentes en 2012 ac Agate é lés milans négres (lien Textes Contes/cuntes) pi ac çhéte istoere çhi arivit a sa cousine remuai de jhérmén, ol at çheuques annàies.